58. හිතෝපදේශය | 02 | වඳුරාගේ කූඤ්ඤ ගැලවිල්ල

“කියවීම මිනිසා සම්පූර්ණ කරයි!”
❤❤❤ ❤❤❤ ❤❤❤ ❤❤❤ ❤❤❤

ඔය කියන වඳුරු නාම්බා එහෙ මෙහෙ පැන යද්දී දුටුවා පට්ටලේ තබා ඇති භාගයක් පලු කර තිබුණ ලී කඳ. අනෙක් ලී වගේ නො වෙයි කදිමට මට්ටම් වෙලා. පැන්නා පට්ටලේ මතට. අර ඉරමින් තිබුණු ලී කඳ මත දෙතුන් වංගියක් එහාට මෙහාට ගියා. හරි අපූරුයි. ඒත් ලීය මැද උලක් ගහලා. සමහරවිට ඒ උල- කූඤ්ඤය ගසූ කෙනාට ගලවා ගන්නට බැරිව යන්නට ඇති. ‘මං වත් මේ උලව්ව ගලවා දානවා’ කියා හිතාගෙන ගැටිස්සියන්ට ඉඟි මරමින් ඉඳ ගත්තා පැලුම් කොටේ මත. කූඤ්ඤ ගැසූ පසු පලමින් සිටි ලී පලු ඈත් වෙනවා නේ. වාඩි වූ වඳුරාගේ වල්ගයයි වඳුරු බව අඟවන අඩුම කුඩුමයි අර පැලුම් ලී අතරින් පහළට වැටුණා. ඒකත් යහපති. ආයෙ සකසුරුවම් කරන්නට දෙයකුත් නෑ. දැන් ඉතින් මේ ඇන්නෑ ලීය ගලවන්නම් කියා එහාට මෙහාට සෙලෙව්වා. තරමක් බුරුල් වුණා. මුළු වීරියම යොදලා ඇද්දා ඉහළට කූඤ්ඤය. ඇද්දා තමා හෙණ හඬ සමාන සද්දයකින් අර අඩක් පැලූ ලී දෙපලු හා වුණා. මොක දෑ ඉතින් වලිගයයි අරකයි දෙක ම චප්ප වුණා. අනේ අර සෙල්ලක්කාර වඳුරා එතැන ම මළා. ඔන්න ඔය කාරණය ගැන හිතලා තමා කීවේ තමන්ට අයත් නැති දේවල්වලට ඇඟිලි බැඟිලි ගහන්න ගියොත් මාරයා අත ළඟයි කියල.

කරටකගේ කතාව අසා සිටි දමනක එය කණකට නො ගෙන මෙහෙම කීවා:

“හරි යාළුවා හරි, ඒක එහෙම වුණා කියමුකෝ. ඒත් හැම සිද්ධියක් ම ඔය වගේ ද? අපේ තනතුරු නැති කළාට තවමත් රාජ්‍ය සේවයේ යෙදෙනවා නේ. බැරි වෙලා වත් රජාගේ බය නැති කරන්නට හොඳ තුරුම්බුවක් වැදුණොත් මොකෝ අපේ කලදසාව වෙනස් වෙන්නෙ නැද්ද? ඇයි ඔය යකාට පෙන්නමු පක්ෂපාතී බවේ තරම! අනිත් එක මහ එවුන්ට වටින් පිටින් හරි හිතවත් කමක් පෙන්නන්නට තියේ නම් මේ වලේ වැටිලා ඉන්න අපේ විජයග්‍රහණයක් නේ.”

දමනකගේ එම කතාවෙන් ද සෑහීමකට නො පත් කරටක මෙසේ කීවා:

“මේ මේ යාළුවා තර්ක විතර්ක කරලා අදහස් උදහස් ප්‍රකාශ කරලා අන්තිමේ පාලකයාගේ මතය හිස් මුදුනෙන් පිළිගෙන ආ වැඩීමේ කාර්ය භාරය තියෙන්නෙ පාලකයාගේ ඉඳුල් කන, දෙපා මිරිකන ප්‍රධාන පෙළේ ඇමතියන්ට පමණයි. හේතුව මේකයි, පාලකයා තනිව ම හිතා කරණ දෙයින් බැරි වෙලාවත් සමාජයට යහපතක් වුණොත් ප්‍රධාන උපදේශකයන්ට කලදසාවක් යයි ද? ඒ නිසා උපදේශකයන් කරන්නේ පාලකයා ගොණාට අන්දවන්නට සුදුසු උපදෙස් ගෙඩි පිටින් ලබාදීම පමණයි. අප වාගේ යටහත් පහත් සේවකයන් කස්තිරම් අල්ලන්නට ගියොත් සිදුවන්නේ කොන්ද බිදගෙන බිම දපන්ට. තමුසේ මේ කියමන අහලා නැද්ද?:

කවුරු හරි තමන්ගේ හිතවත් කම ළෙන්ගතු කම පෙන්වන්නට පාලකයාට ගතු කේළාම් කියනවා. කවුරුන් ගැන ද? මහ එකාගේ ප්‍රධාන මැති ඇමතින් ගැන. ඒකෙන් සිදුවෙන්නෙ මොකක් ද? දැනුවත්ව නො වෙයි ඉබේට ම ‘චී’ කියන ශබ්දය පිට කළ කොටළුවාට වගේ හතර හන්දි කැඩෙන තෙක් පහර කන්නට!”

“ඉඳාකො, ඒ වංගියේ කියන්නට හදන හරුපය කුමක් දැයි දමනක ඇසූ කල කරටක කොටළු කථාව ගෙනහැර පෑවේ මෙසේය:



"Reading maketh a Full man ..."

dhamma.lk.ingreesi.com © 2016 - 2020. Powered by Blogger.
කියවීම මිනිසා සම්පූර්ණ කරයි!

෴ An AnglomaniA IngreesI (රාවණ යක්ඛ) and *A Bona Fide CreatioN ෴

Auto Scroll Stop Scroll