“රාජ අණ නො පිළිපැද්දොත් සිදුවන්නෙ හිස් ගැසුම් කන්නට. බමුණන්ට ගරු සැලකිළි නො දැක්වූයේ නම් මරණයෙන් පසු කෙළින් ම අපායට. පිරිමියෙකු නැතුව ගැහැනියකට නිදාගන්න සිදුවුණොත් තුන් යම රාත්‍රිය මුළුල්ලේ ම කරන්නේ හිල්ලීම. මේවා ආයුධයක් නැතිව වුවත් තමන් විහින් ම කර ගන්නා හිංසා.”

නගරයේ සිට අහම්බයෙන් වනගත වෙන්නට සිදු වූ සංජීවක ආරණ්‍යගත නීති රීති කිසිවක් නො දත්තේ ය. මේ හෙයින් අණ ලත් වහා ම ඔහු කරටක සමීපයට ගොස් අටඟ පිහිටුවා වැඳ වැටුණේය. ඒ ගැන කිව හැකි පැහැදිලි රීතිය මේකයි:

“ඇතා යනු ශක්තිවන්තයෙකි. ගොව්වා කෙසඟයෙකි. කෙසඟ ගොව්වා ඇතා පිට නැඟ හැකි වීර්යයෙන් බෙරයක් ගසයි. දස අත පැතිරෙන්නේ බෙරහඬ. ශරීරය විශාල වුවත් පලක් නැත. අවශ්‍ය වන්නේ බුද්ධියයි. කෙසඟයෙකු පිට මත සිට ඇතුළත හිස් හමකට තඩි ගසද්දී ඇතා නිසොල්මනේ සිටින්නේ බුද්ධිය නැති බැවිනි.”

අහම්බයෙකින් තමන් හට මුහුණ දෙන්නට සිදු වූ අවස්ථාව ගැන කල්පනා කළ සංජීවක සැකයෙන් හා බියෙන් මෙසේ විමසුවේය.

“සේනාධිපති උතුමාණෙනි, ඔබ වහන්සේගේ නියෝගයෙන් මං ආවා. මගෙන් බලාපොරොත්තු වෙන සේවාව වදාළා නම් පණ පුදා හරි ඉටු කරන්නම්.”

“ඔන්න කීවා ගොං කතාවක්. යකෝ ගොණෝ පණ පුදන්නට නො වෙයි පණ රැක ගන්ට ආශාවක් තියේ නම් කළ යුත්තේ අපේ රාජ උත්තමයාගේ ශ්‍රී පාද හතරට ම වැඳලා සමාව ඉල්ලීම.”

“සේනාපති උතුමාණන්ට අනේක වාරයක් පිං. මං ඒක ගැන හරියට ම කරඤ්ඤම්. මගේ අවුච්චියේ කියන තැනකට වදිඤ්ඤම් මට අභය දානය ලබා දෙන්නට හොඳා.”

“යකෝ ගොං තඩියෝ, ඒ අභය දානයෙන් විතරක් පලක් තියේ ද? හොඳට ඔය කං කෙටි ඇරලා අහගනින්. ශක්‍රයාට ශාප කළා ශිශුපාල කියන වේදි රජා. ඒත් ශක්‍රයා ශිශුපාලට කිසිවක් කීවේ නෑ. සිංහයන් සිංහනාද පවත්වන්නේ මේඝ නාදයත් සමග. ඈ බොල එවන් ශ්‍රේෂ්ඨ මහා උත්තමයකු වූ අපේ මහ රජාණන් වහන්සේ අපේ සිවල් නාදය පිළිගෙන තොට සමාව දෙයි ද?

අහගනින් ගොණෝ උඹට ම ගැළපෙන තවත් හේතු තියනවා මෙන්න මෙහෙම:

“හමනවා සැඩ සුළඟක්. මොකෝ ඒ චණ්ඩ මාරුතයෙන් තණකොළ තෝර වගේ වැදගැම්මකට නැති ඒවා විනාශ කර දමනවා ද? ඒත් පලු බුරුත නුග බෝ වැනි මහ ගස් බිමට බාවන්නෙ හිත්පිත් නැතිව. ඒ කියන්නේ ගොණෝ, බලවතා තම බලය වික්‍රමය පාන්නේ තමන් වැනි ම බලවතෙකු සමග මිස උඹ වගේ ගොං නාම්බෙකු සමග නො වෙයි.”