හා මස් ඇතිලිය රන් වන් පාට වූ විට බාගත්තා. ඉතිරි බාගය අවසන් කර රාත්‍රි ආහාරය ගැනීමෙන් පසු කාමරයට ගියා. විමලා පැමිණ නිදි යහන සුවඳවත් කර පාන්දර යාමයේ යන්නට ඇතැයි මට හිතුණා.

“ඔය විමලාගේ කංකරච්චලය තවම ඉවර උණේ නැද්ද අනේ?” මිලිනා අසයි .

“මොන, ඔයාගෙ කං කරච්චලය වගේම තමයි”

“මට නං ලැජ්ජා නෑ.”

“ඒ මොකෝ?”

“කොච්චරවත් ඔයා මට ඇනුම් කෙටුම් කියනවා. ඒත් ලැජ්ජ නැති කමට පස්සෙන් එනවා.”

“ඔය බොරු  ආදරේ වැඩි කමට කියන කතා ගණන් ගන්ට එපා” යි කියා මම ඇය අස්වසා ලීමි. කොහොම නමුත් විවිධ ආකාරයෙන් ලැබූ මිලිනාගේ සහාය නැත්නම් මේ තරම් ලස්සනට මෙම කතාව කියන්නට විපුලෙට නො හැකි වන බව මට වැටහී තිබුණා.

පාසලේ උදේ රෑස්වීම පවත්වාගෙන යද්දී මාණ්ඩලික අධ්‍යාපන නිලධාරී කළු පත බෑගයක් වන වනා පාසලට ඇතුළු වුණා. ඒ විතරක් නම් මදෑ, රැස්වීම් භූමිය මැදින් ගොස් කාර්යාලයට රිංගුවා. මුල් ගුරාත් ඒ පස්සෙන්ම පන්නා ගෙන ගියා. “අනේ මේ වගේ මීහරකුන් දෙදෙනෙක්!” කියා හිතුණේ ආගම අදහන දවසේ ප්‍රධාන රැස්වීමට දක්වපු ගරු සැලකිල්ල ගැන හිතීමෙන්. ඔවුනට නෑසුණා වෙන්නට පුළුවන් ළමයින්ට මං කීවා රැස්වීමක් පැවැත්වෙන තැනකින් යා යුතු තැනකට ආයුතු පිළිවෙත් ගැන.

සිසුන් පන්තිවලට යවා කාර්යාලයට ගිහින් කීවා මට වරුවක් නිවාඩු ඕනෑ. ඒත් සෝමටයි චාන්දනීටයි නිවාඩු දාන්ට එපා ඒ අය රාජකාරියක යෙදී සිටින බවට සලකන්නට කියල. විපුලෙ මහත්තයා ඒ වැඩේ කරන්ට. ඒ ගැන වදවෙන්ටවත් හිතන්නටවන් එපා කියල වික්‍රමසිංහ සිනහමුසුව කීවා.

කුස්සියට ගිහින් පළමුවෙන්ම කළේ මා. අ. නි.ටයි ලොක්කටයි තේ දෙකක් හදා චාන්දනී අත යැවීම. විමලා පොල් ගෑවා. චාන්දනීට කියා දුන්න විදියට එයා එළවළු කැපුවා. පෙරදා රාත්‍රියේ ගෙනා මස් වලින් සෑහෙන ප්‍රමාණයක් ගෙන ලුණු හා විනාකිරි දමා තැම්බුවා. චීන ක්‍රමයට මස්  ඉස්ටුව හදන්ට අවශ්‍ය කළමනා හදන්ට සෝමට උපදෙස් දුන්නා. කුමාරි වැඩට ගිහින් හිටියේ නෑ. ඇය ලවා වම්බටු  බැද්දුවා. අල ලිපක තැම්බෙනවා. පරිප්පු ගරා, ළූණු කරපිංචා  වැනි සුවද වර්ග තෙලේ කර කර තෙලෙන් තැම්බෙන්ට ඇරියා. විමලා කරන්නේ මැලේ අච්චාරුවට අවශ්‍ය දෑ සැකසීමයි. අබ, එනසාල්  හා ගම්මිරිස්  විනාකිරෙන් ඇඹරීම මම කළා. පෙති කැපූ මස් ලුණු ගම්මිරිස් යොදා බදින්ට සූදානම් කළා. තැම්බුණ අල කෑලි මිරිස් ඇතුළු තුන පහ සමග රන්වන් පාටට පෙති ගැසූ  ළූණු  කලවම් කර ලිපෙන් බා පසෙක තැබුවා. කසාවතක් වන් පරිප්පු හට්ටිය මිටි කිරෙන් ස්නානය කර පසෙක සැතපෙයි. තෙල් බේරුණ මස් ඉස්ටුව කටට කෙළ උණවමින් තැනක හිදී. බටු මෝජුව හා මැලේ අච්චාරුව පදමට පැමිණ සිටී. පපඩම් හා පිපිඤ්ඤ සලාදය ආහාර ගැනීම ආසන්නයේ සකසනු පිණිස සූදානමින් ඇත.